Бұл картиналар Италияның Парма қаласына жақын орналасқан Маньяни-Рокка қорынан ұрланған, – деп хабарлайды aqshamnews.kz тілшісі.
Танымал суретшілердің бірнеше миллион еуро тұратын құнды картиналарын тонау әрекеті 22-сінен 23 наурызға қараған түні болған. Ұрланған туындылар қатарында Пьер Огюст Ренуардың "Балықтар", Поль Сезаннның "Шиелер салынған натюрморт" және Анри Матисстің "Террасадағы одалиска" атты еңбектері бар.
Полицияның мәліметінше, қылмысты төрт адам жасаған.Олар кіреберіс есікті бұзып, 1-қабаттағы залдардың біріне кіріп, музей бақшасы арқылы қашқан. Олардың операциясы үш минутқа жетпейтін уақыт ішінде жүзеге асқан. Олар дабыл жүйесі іске қосылған соң ұрламақ болған төртінші картинаны музей ішінде қалдырып кеткен.