Тегеран АҚШ-пен қақтығысты тоқтату мәселесі Иран ұсынған талаптар толық қабылданған жағдайда ғана талқыланатынын мәлімдеді. Мұндай талаптардың қатарында соғысты тоқтату, қайта шабуыл жасамауға кепілдік беру және әскери шығын үшін өтемақы төлеу бар, – деп хабарлайды aqshamnews.kz тілшісі.
Иран билігі АҚШ-пен қақтығысты тоқтату бойынша ұсынылған нұсқаны қабылдамай, келіссөздер тек Тегеран ұсынған талаптар толық орындалған жағдайда ғана басталатынын мәлімдеді. Ресми ұстанымға сәйкес, Иран өзіне тиімді әрі нақты кепілдіктерсіз бітімге келуге ниетті емес.
Тегеранның басты талаптарының бірі – қарсы тараптың әскери әрекеттерін және адам шығынына әкелетін шабуылдарды толық тоқтату. Сонымен бірге Иран ел аумағында соғыстың қайта тұтануына жол бермейтін нақты тетіктердің жасалуын талап етіп отыр.
Бұдан бөлек, Иран әскери шығын үшін өтемақы мен репарация төлеуге кепілдік берілуін міндетті шарттардың бірі ретінде қарастырады. Сондай-ақ ресми Тегеран аймақтағы барлық бағытта соғыстың толық тоқтатылуын және Ормуз бұғазына қатысты егемен құқықтарының мойындалуын талап етуде.
Иран тарапы бұл талаптар толық қабылданбайынша келіссөздер басталмайтынын ашық айтты. Сонымен қатар, ирандық шенеуніктер қорғаныс сипатындағы әскери операциялар әзірге жалғасатынын жеткізді.