Қазақстанда 2% адам ғана үйден тыс жерде тамақтанады екен.
Әлемдік рейтингте Қазақстан дамыған елдерден, сондай-ақ әлемнің дамушы экономикаларының көпшілігінен асып, азық-түлікке көп ақша жұмсайтын елге жатады, деп хабарлайды Almaty-akshamy.kz
“Халықтың азық-түлікке жұмсалатын шығысының жоғары үлесі Қазақстандағы тұтынудың ерекшелігі саналады. Олардың үлесі елдегі қолайлы экономикалық жағдайға қарай 45%-ға өзгеріп, дағдарыс кезеңдерінде 50%-дан асып түседі. Соңғы деректер бойынша азық-түлікке жұмсалатын шығыс үлесі жиынтық шығыстың 50%-дан астамын алады”, – деп жазылған Ұлттық банк талдауында.
Қазақстанда қалыптасқан тұтыну маңыздылығы себептерінің бірі – үйде тамақ дайындап, үйден тамақ ішуге байланысты қалыптасқан әдеттер. Үйден тыс жерде тамақтануға жұмсалатын шығыс үлесі аз және 2011 жылдан бері аса өзгерген жоқ (2011 жылы 2,9%, 2022 жылы – 2,2%).
Азық-түлікке жұмсалатын шығыстың жоғары деңгейіне халықтың әл-ауқат деңгейі де әсер етеді.