Қазақстандықтар саны бір айда 26 мыңға артты.
Ұлттық статистика бюросының мәліметінше, Қазақстан халқы 2022 жылғы қарашада 26,1 мың адамға көбейіп, 1 желтоқсандағы ақпарат бойынша, 19 млн 741,3 мың адам болды, деп хабарлайды Almaty-akshamy.kz.
Мәселен, қаңтар-қарашада Қазақстан халқының табиғи өсімі 246 мың 144 адамды құрады (2021 жылғы қаңтар-қарашада - 243 мың 581 адам).
Елдегі демографиялық жағдайдың басқа сипаттамалары бойынша тиісті уақыт көрсеткіштері: бала туу - 369 мың 140 (413 мың 25), өлім-жітім - 122 мың 996 адам (169 мың 444).
Сондай-ақ, статистика бюросы 2022 жылғы қаңтар-қарашада республикада 118 мың 928 неке қиылғанын хабарлады (2021 жылғы қаңтар - қарашада-129 мың 273).
Сонымен қатар, қаңтар-қараша айларында 16 мың 334 ажырасу тіркелді (17 мың 738).
Статистиктердің мәліметінше, өткен жылы қаңтар-қараша айларында Қазақстаннан 23 мың 333 адам (2021 жылдың қаңтар-қараша айларында - 30 мың 227), елге 15 мың 313 адам (8 мың 140) көшіп келген.
Осылайша, статистика мамандары атап өткендей, 2022 жылғы қаңтар-қарашада республикада көші-қонның теріс сальдосы 8020 адамды құрады.