Алматыда Haval көлігінің жүргізушісі қарсы бағытта келе жатқан жеңіл автокөлікті соғып, кейін полициядан қашуға әрекеттенген, деп хабарлайды Aqshamnews.kz тілшісі.
Әлеуметтік желіде тараған видеоны Алматы қалалық Полиция департаменті ресми түрде растады. Ведомство мәліметінше, оқиға 24 қаңтарда сағат 23:06 шамасында Тимирязев көшесінде болған. Түнгі тыныштықты күзету барысында полиция қызметкерлері бордюрге соғылған Haval көлігін байқап, тоқтату туралы заңды талап қойғанымен, жүргізуші бағынбай, қозғалысын жалғастырып кеткен.
Қуғын кезінде Жароков пен Өтепов көшелерінің қиылысында аталған көлік басқа автокөлікпен соқтығысқан. Жол-көлік оқиғасынан кейін де жүргізуші оқиға орнынан кетпек болғанымен, полицейлер оны ұстап үлгерген. Тексеру барысында жүргізушіден алкогольдік масаңдық белгілері анықталған.
Полицияның хабарлауынша, жүргізуші — шетел азаматы. Оған қатысты бірнеше әкімшілік құқық бұзушылық бойынша материалдар рәсімделген: мас күйінде көлік басқару, полиция талабына бағынбау және жол-көлік оқиғасын жасау.
Әкімшілік сот шешімімен құқық бұзушы 20 тәулікке әкімшілік қамауға алынып, 7 жылға көлік басқару құқығынан айырылған. Көлік арнайы айып тұрағына қойылды. Полиция департаменті мас күйінде көлік жүргізу мен құқық қорғаудан қашу әрекеттері жол қозғалысына қатысушылардың өмірі мен денсаулығына тікелей қауіп төндіретінін ескертті.