«Global Scholars» халықаралық жобасы: Алматыда қалалық конференция табысты өтті, – деп хабарлайды aqshamnews.kz тілшісі.
2026 жылғы 21 мамырда №15 гимназия базасында «Алматы пилоттық мектептеріндегі “Global Scholars” халықаралық жобасын оңтайландыруға арналған AI құралдары» тақырыбында қалалық конференция өтті. Іс-шара Global Scholars халықаралық жобасына қатысушы Алматы қаласының пилоттық мектептерінің педагогтерін біріктіріп, инновациялық тәжірибе алмасуға, заманауи AI-құралдарын білім беру үдерісінде қолдану жолдарын талқылауға мүмкіндік берді.
Конференцияны Алматы қалалық жаңа технологиялар ғылыми-әдістемелік орталығы пилоттық мектептермен бірлесіп ұйымдастырды. Іс-шараның негізгі мақсаты — жасанды интеллект технологияларын жобалық оқытуға енгізу бойынша Алматы пилоттық мектептерінің тәжірибесін тарату, халықаралық ынтымақтастықты дамыту және оқушылардың XXI ғасыр дағдыларын жетілдіру болды.
Конференция «Global Scholars» жобасының әнұранымен ашылып, қатысушыларға шығармашылық пен ынтымақтастық рухын сыйлады. Ашылу бөлімінде қатысушылар цифрлық технологияларды білім беру жүйесіне енгізудің маңыздылығын атап өтіп, халықаралық жобалардың оқушылардың жаһандық ойлау қабілетін дамытудағы рөлін ерекше атап өтті.
Алғашқы баяндаманы Лариса Петрова жасап, «Global Scholars» жобасындағы жасанды интеллекттің рөлі туралы баяндады. Қатысушылардың ерекше қызығушылығын пилоттық мектеп педагогтерінің практикалық тәжірибелері тудырды. Олар ағылшын тілі сабақтарында және жобалық жұмыстарда AI-құралдарын тиімді қолданудың нақты мысалдарын көрсетті.
Халықаралық жобаны ұйымдастыру және басқару стратегияларымен №15 гимназия директоры Қойшыбаева Зоя Кашқынбайқызы бөлісті.
№15 гимназия педагогтері — Аслан Серикканов, Жансая Денгельбай, Камиля Болеген, Сандугаш Жассузак, Бану Амирхан және Светлана Ливерко — AI көмегімен жасалған визуалды материалдарды қолдану тәжірибесімен бөлісіп, оқушылардың жобалық қызметте жасанды интеллектті пайдалану мүмкіндіктерін талқылады.
№28 мектеп-лицей өкілдері — Манзура Сатанова және Наталья Соколова — CapCut және VN бағдарламалары арқылы білім беру бейнежобаларын әзірлеу тәсілдерін таныстырды.
№69 мектеп педагогтері — Елена Дякина және Диана Бакаева — Quizlet AI платформасын жаһандық азық-түлік мәселелерін зерттеуде қолдану тәжірибесімен бөлісті.
Қатысушылардың қызығушылығын №26 мектеп педагогтері — Нурзат Таскожаева және Акбидай Худайберген — ұсынған Canva AI құралдарын шығармашылық жобалық жұмыстарда қолдану тәжірибесі де тудырды.
№34 гимназия мұғалімдері — Лилиана Алыбаева, Айгерим Ажихан және Тахмина Пайзаханова — оқушылардың зерттеу жұмыстарын жетілдіруге арналған AI-құралдарын таныстырды.
Ал №162 мектеп-гимназия өкілдері — Ердаулет Бакытулы, Гульнара Кулманбетова, Карлыгаш Минулина және Сауле Сайдыкеева — жасанды интеллект көмегімен топтық жұмысты ұйымдастыру және ынтымақтастықты дамыту әдістерімен бөлісті.
Конференция соңында дөңгелек үстел ұйымдастырылып, қатысушылар білім беру саласында AI-технологияларын қолданудың болашағын талқылап, пікір алмасты және «Global Scholars» жобасы аясындағы болашақ халықаралық ынтымақтастық бағыттарын айқындады.
Конференция жоғары ұйымдастырушылық деңгейде өтіп, Алматы педагогтері үшін кәсіби диалог, инновация және тәжірибе алмасу алаңына айналды. Қатысушылар ұсынылған материалдардың практикалық маңыздылығын атап өтіп, жасанды интеллект технологиялары білім беру үдерісін заманауи әрі тиімді етуге үлкен мүмкіндік беретінін айтты.
Өткен іс-шара білім беру саласындағы инновациялар ынтымақтастықтан, шығармашылықтан және педагогтердің үздіксіз дамуға ұмтылысынан басталатынын тағы бір мәрте дәлелдеді.