Неміс басылымы Алматыны «мәдениеттердің қайнаған қазаны» және еуропалық саяхатшыларды баурап алатын жаңа орталық ретінде сипаттады, деп хабарлайды aqshamnews.kz
Мақала авторы Каспер Эстеррайх Алматының қарқынды дамып келе жатқанын және Қазақстанның өңірдегі ең қызықты туристік бағыттардың біріне айналғанын атап өтеді. «Қазақстан түрленіп келеді», — деп жазады журналист, елдің инфрақұрылым мен туризм саласына белсенді инвестиция салып жатқанын, ал Алматының Орталық Азияның мәдени және гастрономиялық жүрегіне айналып келе жатқанын айтады.
Автордың айтуынша, қала кеңестік дәуірді, заманауи жайлылықты және табиғаттың ғажайып сұлулығын үйлестіре білген. «Мұнда әрбір көрініс – ашық хаттай әсерлі. Мегаполистің қарбалас көшелерінен небәрі бірнеше шақырым ұзаған сәтте тау мен дала және Гранд-Каньонды еске салатын шатқалдар бар.
RNZ Алматыны «алма қаласы» деп атап, оны жайлы, өмірге толы және қуатқа толы шаһар ретінде көрсетеді. Материалда қаладағы басты көрнекті орындар — Вознесенск соборы, Арбат, Көк базар және қалаға тыныс беретін саябақтар ерекше бейнеленеді.
Неміс басылымының бұл мақаласы Еуропаның Қазақстанға деген қызығушылығының артып келе жатқанын тағы бір мәрте паш етті. Мақала авторының сапары Almaty Tourism Bureau қолдауымен және Air Astana әуе компаниясының серіктестігімен жүзеге асқан. Компания Франкфурт пен Алматы арасында тікелей әуе қатынасын орындайды.
Журналистің айтуынша, бүгінгі Алматы бұл мегаполистің заманауи тынысы, табиғат және нағыз қазақы қонақжайлық тоғысқан әлемдік деңгейдегі қала.
Rhein-Neckar-Zeitung (RNZ) — 80 жылдан астам тарихы бар Германияның ең көне басылымдарының бірі. Гейдельберг қаласында орналасқан газет елдің түкпір-түкпірінде кең оқырманға тарайды. Басылым саяхат, мәдениет пен іскерлік қауым арасында сенімді ақпарат көзі ретінде танымал.
