Қазақстанның танымал боксшысы, кәсіпқой рингте әлем чемпионы атанған Геннадий Головкин 2026 жылы Халықаралық бокстың Даңқ залына (International Boxing Hall of Fame) енгізіледі, - деп хабарлайды Aqshamnews.kz ұйымның ресми сайтына сілтеме жасап.
АҚШ-та орналасқан бокс музейі жыл сайын кәсіпқой бокста ерекше жетістікке жеткен үш спортшыны марапаттайды. Биыл олардың қатарында 43 жастағы Головкин бар. Ол – Даңқ залында есімі жазылатын алғашқы қазақстандық. Бұған дейін посткеңестік елдерден тек ағайынды Владимир және Виталий Кличко, сондай-ақ Костя Цзю ғана бұл мәртебеге ие болған.
Даңқ залында әлемнің әйгілі боксшылары — Мұхаммед Али, Майк Тайсон, Флойд Мейвезер, Оскар Де Ла Хойя, Леннокс Льюис және Мэнни Пакьяо секілді чемпиондардың есімдері де бар.
Головкин 2022 жылға дейін орта салмақта (72,5 кг) IBF, IBO және WBA нұсқалары бойынша әлем чемпионы болды. Кәсіпқой мансабында 42 жеңіс, бір тең есеп және екі жеңіліс тіркеген. Әуесқой бокста 2002 жылғы әлем чемпионы, 2004 жылғы Афина олимпиадасының күміс жүлдегері атанды.
Айта кетейік, 2024 жылдан бастап Головкин Қазақстанның Ұлттық олимпиада комитетін басқарып келеді. Жақында ол әуесқой бокстағы World Boxing ұйымының президенті болып сайланды.