, – деп хабарлайды aqshamnews.kz тілшісі.
Қаныш Сәтбаевтың өмірі геологиялық экспедициялармен, ұзақ сапарлармен тығыз байланысты. Қазақ ғылымының негізін қалаған ғалым мыңдаған шақырымды көлікпен жүріп өткен. Тіпті кей сапарларда машинаның кабинасы оның жұмыс орны әрі демалатын жері болған.
Даладағы серігі – ГАЗ-АА
1930 жылдары Сәтбаев бастаған геологтар ГАЗ-АА жүк көлігін, ел арасында «полуторка» атанған машинаны кеңінен пайдаланған. Экспедицияға шыққанда оның кузовына құрал-жабдық, азық-түлік тиеліп, геологтар да сонда жайғасатын.
Аптап ыстық пен қақаған аязда мыңдаған шақырым жүруге тура келген. Кейін Сәтбаев басшылық қызметке келгенде геологтар мінетін жүк көліктерінің үстін жауып, ішіне жылытатын пеш орнатуға тапсырма бергені айтылады.
Жолсыз далаға – ГАЗ-69А
1950 жылдары геологтардың жағдайы біршама жақсарды. Сәтбаев Қазақстан геологтарының жаңа ГАЗ-69А жол талғамайтын көліктерін алғашқылардың бірі болып алуына ықпал еткен.
Толық жетекті, бес адамға арналған бұл машина шалғайдағы кен орындарына жетуге әлдеқайда қолайлы еді. Уақыт өте келе ГАЗ-69А геологтардың ең сенімді көліктерінің біріне айналды.
Неге Сәтбаевтың ЗИМ-і сұр түсті болды?
Қазақстан Ғылым академиясының тұңғыш президенті ретінде Қаныш Сәтбаевқа қызметтік көлік берілген. Алдымен ол ГАЗ-М20 «Победа», кейін ГАЗ-М12 ЗИМ мінген.
Бір қызығы, сол кезеңдегі лауазымды тұлғалардың ЗИМ-і негізінен қара түсті болса, Сәтбаев сұр түсті көлікті таңдаған. Бұл ғалымның қарапайым болмысымен байланыстырылып жүр. Сұр ЗИМ оған 1964 жылға дейін қызмет еткен.
Ал алғашқы көліктердің бірі – Ford
Сәтбаев еңбек жолын бастаған 1920 жылдары Атбасар түсті металдар тресінің геологтары америкалық Ford көліктерін пайдаланған. Олар революцияға дейін Жезқазған кен орындарын игерген ағылшын кәсіпкерлерінен қалған техникалардың қатарында болған.
Қарапайым әрі төзімді Ford машиналары сол кездегі қазақ даласында геологтар үшін таптырмас көлік еді.
Осылайша, Қаныш Сәтбаев мінген машиналардың тарихы – жай ғана автомобильдер туралы әңгіме емес. Ford пен «полуторкадан» басталған жол кейін қазақ ғылымының тұңғыш академигінің сұр ЗИМ-іне дейін жалғасты.
Материал Tengri Auto және QAZ-Auto деректері негізінде әзірленді.