Ғылым кандидаты дәрежесі және қауымдастырылған профессор атағы үшін – 93 мың теңге, ал доктор дәрежесі үшін 185 мың теңге қосымша ақы алатын болады.
Сенат Мәжіліс қабылдаған "Қазақстан Республикасының кейбір заңнамалық актілеріне ғылым және білім беру мәселелері бойынша өзгерістер мен толықтырулар енгізу туралы" заңды мақұлдады, деп хабарлайды аlmaty-akshamy.kz.
Заңның негізгі мақсаты – ғылым және білім беру саласындағы ұлттық заңнаманы одан әрі жетілдіру.
"Құжат ғылыми зерттеулердің тиімділігін арттыруды, ғалымдар үшін әлеуметтік кепілдіктерді жақсартуды және ғылымдағы қаржы ресурстарын пайдалануды оңтайландыруға бағытталған механизмдерді енгізуді, сондай-ақ мерзімді әскери қызметтің белгіленген мерзімін өткерген азаматтарымызға білім алуда бірқатар жеңілдіктер беруді көздейді. Атап айтқанда, заңда бірқатар жаңа өзгерістер мен толықтырулар қарастырылған. Біріншіден, жергілікті атқарушы органдарға ғылым және ғылыми-техникалық қызмет саласындағы мемлекеттік саясатты іске асыру құқығын беру арқылы, өңірде ғылыми және ғылыми-техникалық жобалар мен бағдарламаларды ұйымдастыру және іске асыру бойынша құзыреттер беріледі", - деді сенатор.
Екіншіден, мемлекеттік жоғары және жоғары оқу орнынан кейінгі білім беру ұйымдарында ғылыми-педагогикалық қызметпен айналысатын педагогтарға және ғылыми-зерттеу жұмыстарын жүргізетін ғылыми қызметкерлерге – ғылыми атағы үшін 25 еселенген АЕК-ке дейін және "профессор" – ғылыми атағы үшін 50 еселенген АЕК-ке дейін қосымша ақы белгілеу ұсынылып отыр, деп жалғастырды ол. Қазір бұл сәйкесінше 17 және 34 АЕК болып белгіленген.
"Яғни, ғылым кандидаты дәрежесі және қауымдастырылған профессор (доцент) ғылыми атағы үшін – 93 мың теңге, ал бейіні бойынша доктор дәрежесі және профессор ғылыми атағы үшін – 185 мың теңге қосымша ақы алатын болады. Сонымен қатар, ЖОО-ларда және ғылыми ұйымдарда бес жылдан кем емес жұмыс істейтін ғалымдар үшін ғылыми, ғылыми-педагогикалық және ғылыми-техникалық сипаттағы жұмыстарды аяқтау үшін орташа жалақысын сақтай отырып, 1 жылға дейін шығармашылық демалыс алуға құқық беріледі. Гранттық және бағдарламалық-нысаналы қаржыландыру жобаларының тиімді орындалуын қамтамасыз ету мақсатында жобаның ғылыми басшысына күнтізбелік жылға бекітілген жалпы көлем шеңберінде қаражатты шығындар баптары арасында қайта бөлу құқығы қарастырылған", - деді Талғат Жүнісов.
Заңмен "ғылыми әдеп" ұғымы енгізіледі.
"Үшіншіден, Қазақстан Республикасы азаматтарының мерзімді әскери қызметті өткеру кезеңінде өткізілетін конкурстық іріктеу негізінде, мерзімді әскери қызметтен шығарылған күннен бастап 1 жыл ішінде жоғары әскери және арнаулы, жоғары және жоғары оқу орнынан кейінгі оқу орындарына түсуге жеңілдіктер беру, сондай-ақ алғашқы жылы жатақханадан орын алуға басым құқық беру көзделеді", - деп атап өтті спикер.