Әзірбайжан астанасы Бакуден сүйінші хабар жетті!
Әдеби сыйлықты табыстау салтанаты Әзірбайжан Республикасы Ұлттық Ғылым академиясының залында өтті.
Абай атындағы Мемлекеттік сыйлықтың иегері Ғалым Жайлыбай Түркия Республикасы Ататүрік атындағы Мәдениет, Тіл және Тарих Жоғарғы Мекемесі мен Түрік Тіл қауымдастығы Түркі әлеміне ортақ мәдени құндылықтарды насихаттау мақсатында ұйымдастырған «Тіл мейрамы» бағдарламасы аясында «Түрік бірлігі» әдеби сыйлығының лауреаты атанды, деп хабарлайды Almaty-akshamy.kz.
Бұл – Түркі әлемінің ең жоғарғы әдеби сыйлығы!
«Мәртебелі сыйлықты Түрік тілі қауымдастығының Президенті Осман Мерт табыстады. Тұңғыш рет ұйымдастырылған Халықаралық байқаудың үздіктері қатарында Әзірбайжан ақыны Сабир Рюстемханли, Қырғызстан шайыры Аида Егембердиева, Өзбекстаннан Улугбек Хамдамов және Солтүстік Кипр Түрік Республикасынан Октай Оксюзоглу бар. Тұтас Түркі әлемінен ат оздырған бес ақынның қатарында Арқаның Ай таңбалы Арғымағы Ғалым ағамыздың болуы – бүкіл қазақ елінің мерейі», - деп Нұргүл Шамаева өзінің әлеуметтік желісі арқылы қуанышты жаңалықпен бөлісті.
Жеңімпаздар халықаралық шығармашылық ұйымдар мен мекемелердің ұсынысы мен бағалауы негізінде анықталып, барлық үміткерлердің шығармалары алдын-ала түрік тіліне аударылып, жинақ болып шыққан екен.