Футболдан Қазақстан ұлттық құрамасының бас бапкері міндетін уақытша атқарушы болып Талғат Байсуфинов тағайындалды, - деп хабарлайды Aqshamnews.kz.
Бұл туралы Қазақстан футбол федерациясы (ҚФФ) ресми мәлімдеді.
Отандық тәжірибелі маман 2026 жылғы әлем чемпионатының іріктеу кезеңі аясында өтетін алдағы екі ойынға құраманы дайындайды. Атап айтқанда, Қазақстан 10 қазанда Лихтенштейнмен, ал 13 қазанда Солтүстік Македониямен кездеседі.
Талғат Маруаұлы бұған дейін де ұлттық құраманы екі кезеңде — 2016–2017 және 2020–2022 жылдары басқарған. Қазіргі уақытта ол жастар құрамасы (U21) бапкерлерінің менторы ретінде жұмыс істеп келеді.
Қазақстан футбол федерациясы Байсуфиновтің мол тәжірибесіне сенім артып, алдағы ойындарда сәттілік тіледі. Сонымен қатар, ҚФФ ұлттық құраманың тұрақты бас бапкері қызметіне үміткерлермен келіссөздер жүргізіп жатқанын мәлімдеді. Тізімде үш шетелдік маман бар.
Еске сала кетейік, бұған дейін футболдан Қазақстан құрамасының бас бапкері Әли Әлиев қызметінен босатылғанын хабарлаған едік.