Мәжіліс депутаты Ринат Заитов Бас Прокурорға және Ұлттық қауіпсіздік комитетінің төрағасына арнайы сұрау жолдап, Қазақстандағы әйелдер мен ЛГБТ құқығын қорғаумен айналысатын «Феминита» ұйымының қызметіне қарсы шықты, деп хабарлайды aqshamnews.kz.
Ринат Заитовтың пікірінше, «Феминита» қазақ халқының ар-намысына тікелей нұқсан келтіріп, жастарды теріс жолға түсіруге ықпал етіп отыр.
«Тәуелсіздік алған сәттен бастап, Қазақстан өз есігін айқара ашып, достар да, дұшпандар да кіріп келе бастады. Бұл – жасырын емес. Біз достарымызды тапқанына, қандастарымызды елге қайтарғанына қуандық, әрине. Алайда, біздің дұшпандарымыз іштен іріткі салғысы келіп, өздерінің арам пиғылдарын жүзеге асыруда. Соның бірі – ЛГБТ қауымдастығы және “Феминита” ұйымы. Бұл – әлемдік деңгейде зұлымдық жасайтын қауіпті ұйым, ол біздің жастарымызды құртуға бағытталған», – деп мәлімдеді депутат.
Ринат Заитов «Феминитаның» әрекеттерін қоғамға қауіп төндіретін экстремистік әрекет ретінде қарастырып, оны заңдық тұрғыдан тоқтату қажеттігін айтты.