Сондай-ақ қалада QR-кодтары бар ақпараттық плакаттар орналастырылған, деп хабарлайды Aqshamnews.kz тілшісі.
Қазақстан Республикасы Құрылтайы депутаттарының 23 тамызда өтетін сайлауына санаулы күндер қалды. Алматыда ақпараттық-түсіндіру жұмыстары жалғасуда. Оның мақсаты — әрбір азаматқа дауыс беруге қатысуға байланысты ең жиі қойылатын сұрақтарға уақытылы жауап алуға көмектесу.
Алматы қаласы аумақтық сайлау комиссиясының төрағасы Айгүл Қалықованың айтуынша, мегаполис тұрғындарын көбіне өздерінің сайлау учаскесінің орналасқан жері және сайлаушылар тізіміне енгізілген-енгізілмегенін қалай тексеруге болатыны қызықтырады.
Бүгінде мұны бірнеше жолмен жасауға болады. Ең ыңғайлы тәсілдердің бірі — Алматы әкімдігінің ресми сайтындағы немесе Қазақстан Республикасы Орталық сайлау комиссиясының интернет-ресурсындағы арнайы сервисті пайдалану. Ол үшін жеке сәйкестендіру нөмірін (ЖСН) енгізсе жеткілікті. Жүйе сайлау учаскесінің нөмірі мен мекенжайын көрсетеді.
Сонымен қатар қалада QR-кодтары бар ақпараттық плакаттар орналастырылуда. Оларды сканерлегеннен кейін азамат электрондық сервиске өтіп, өзінің ЖСН-ын енгізу арқылы қажетті ақпаратты ала алады. Бұдан бөлек, 109 бірыңғай қалалық байланыс орталығы арқылы кеңес алуға болады.
Дайындықтың тағы бір маңызды бөлігі — аты-жөні көрсетілген шақыруларды табыстау. Алматы тұрғындарына тіркелген мекенжайы бойынша сайлау учаскесінің мекенжайы мен оның жұмыс уақыты көрсетілген шақырулар жеткізіледі. Аумақтық сайлау комиссиясының мәліметінше, учаскелік комиссия мүшелері шамамен 539 мың бірегей мекенжайға баруы тиіс. Алматыда 1 миллион 329 мыңнан астам сайлаушы тіркелген.
Тұрғылықты жері бойынша тіркеуі жоқ азаматтар үшін бір күндік тіркеу тетігі қарастырылған. Дауыс беру күні мұндай сервис қаланың 41 сайлау учаскесінде қолжетімді болады. Бұл қажетті құжаттарды алдын ала рәсімдеген азаматтарға өздерінің сайлау құқығын жүзеге асыруға мүмкіндік береді.
7 тамыздан бастап Алматы тұрғындары өздерінің сайлау учаскесіне барып, сайлаушылар тізіміне енгізілген-енгізілмегенін тексере алады. Егер қандай да бір қателік анықталса, оны дауыс беру күніне қалдырмай, алдын ала түзетуге болады.
Денсаулық жағдайына байланысты сайлау учаскесіне өздігінен келе алмайтын азаматтар үшін де арнайы тәртіп қарастырылған. Заңнама оларға үйде дауыс беру мүмкіндігін береді. Мұндай құқық ауыр науқас отбасы мүшесіне күтім жасап отырған және осы себепті үйден шыға алмайтын азаматтарға да беріледі.
Үйде дауыс беруді ұйымдастыру үшін өз учаскелік сайлау комиссиясына алдын ала жүгініп, тиісті өтініш беру қажет. Мұны 7 тамыздан бастап 23 тамыз сағат 12:00-ге дейін жасауға болады. Өтініш түскеннен кейін дауыс беру күні комиссия мүшелері сайлаушының үйіне жылжымалы дауыс беру жәшігімен барып, оның конституциялық құқығын жүзеге асыруына мүмкіндік береді.
Дауыс беру күні өз елді мекенінен тыс жерде болатын азаматтардың сайлауға қатысу мәселесі де өзекті. Мұндай жағдайда заңнамада есептен шығару куәлігін беру қарастырылған.
Оны 7 тамыздан бастап 22 тамыз сағат 18:00-ге дейін тіркелген жері бойынша алуға болады. Осы құжат арқылы азамат бастапқыда сайлаушылар тізіміне енгізілген учаскесін қоспағанда, елдегі іс жүзінде кез келген сайлау учаскесінде дауыс бере алады.
Егер жоспар өзгеріп, азамат дауыс беру күніне дейін үйіне оралса, есептен шығару куәлігін өзінің учаскесіне тапсыра алады. Осыдан кейін ол қайтадан сайлаушылар тізіміне енгізіліп, тіркелген жері бойынша дауыс бере алады.
Аумақтық сайлау комиссиясындағылар қазіргі сайлауда электрондық немесе қашықтан дауыс беру заңнамада қарастырылмағанын еске салады. Әрбір сайлаушы жеке өзі дауыс береді. Заңда белгіленген тәртіп бойынша үйде дауыс беру ұйымдастырылатын жағдайлар бұған кірмейді.
Алматыдағы барлық сайлау учаскелері 23 тамыз күні сағат 7:00-ден 20:00-ге дейін жұмыс істейді. Мамандар сайлаушыларға өз учаскесінің мекенжайын алдын ала нақтылап, тізімде бар-жоғын тексеріп, қажет болған жағдайда барлық қажетті құжаттарды уақытылы рәсімдеуді ұсынады. Бұл дауыс беру күні туындауы мүмкін артық сұрақтардың алдын алып, азаматтарға өздерінің сайлау құқықтарын кедергісіз жүзеге асыруға мүмкіндік береді.