Бейсенбінің таңында Алматы әуежайында отандастары Ризабек Айтмұханды салтанатпен күтіп алды.
Әуежайдың күту залы еркін күрестен Қазақстан тарихындағы тұңғыш әлем чемпионын әрі ел тарихына аты қалатын ең жас балуанды қарсы алуға келген қауымға лық толды. Олар жүлделі жүйріктерді шара толы ақ дәммен, құшақ толы гүл шоқтарымен қарсы алды.
Сербия астанасында ала кілемді қарсыластарының жауырынымен қаққан жүлдегерлер Ризабек Айтмұхан мен Азамат Дәулетбековке жанкүйер отандастары иығына шапан жауып ел ықласын білдірді. Күтіп алу кезінде салтанатты марш екпіні, ақ нөсердей сіркіреген ду қол шапалақ үні әуежайды кернеп тұрды.
БАҚ өкілдеріне берген жауабында балуан былай деп тебіренді: «Мұндай қошеметпен қарсы алып жатқан еліме алғыс айтамын. Өте күшті сезімде болып тұрмын.... Сөзбен айтып жеткізе алмаймын. Бұл менің арманым еді. Отандастарыма осындай сәтті сыйлағаныма қуаныштымын».
Жарыс жайындағы сөзінде Ризабек: «Қарсыластар осал болған жоқ, әрине. Дегенмен, шешуші кезде барымды салдым. Соңына қарай қарсыластың шаршағанын байқадым. Сол сәтті ұтымды пайдаландым деп ойлаймын», – деп алғынан жарылды.
Белградтағы белдесуде қола жүлдеге ие болып, Париж олимпиадасының жолдасын ұтып келген отандасымыз Азамат Дәулетбеков те қошамат көрсеткен жұртқа ризашылығын жеткізді. Әрі өзінің әріптесі Ризабекке деген шынайы құрметімен бөлісті. «Ризабекке ризамын, 19 жасында елімізден алғашқы әлем чемпионы атанды. Бұнысы жастарға үлгі, тіпті бізге де мотивация берді», – дейді Азамат.
Республикалық грек-рим, еркін және әйелдер күресі федерациясының вице-президенті Білалдин Ушуров жиылған жұртты құттықтады. Білалдин Талғатұлы сөзінде: «Еркін күрестен тарихымыздағы бірінші чемпионымыз келіп жатыр. Баршаңызды осы қуанышпен құттықтаймын. Келешекте осы баламыздың жолының ашық болуын, келесі жолы Францияда олимпиада чемпионы атанып, баршамызды қуантсын деп тілеймін!», – деді.
Айта кетейік, Сербияның орталық қаласы Белградта өткен әлем чемпионатында Ризабек 92 кг салмақта әлем біріншілігін жеңіп алды. Бұл ел тарихында еркін күрестен алған алғашқы чемпиондық атақ.