Алматыдағы №2 арнайы мектеп-интернатында түлектердің болашақ мамандығын таңдауға көмектесуге арналған «Жарқын болашақ баспалдағы» атты кездесу кеші өтті. Бұл білім ордасында қазіргі таңда 168 ерекше бала оқып жатса, олардың ішінде биыл 9-сыныпты аяқтайтындар да бар.
Мектеп-интернатта білім беру 1-10 сынып аралығында жүреді. Оқушылар 10-сыныпты қосымша бағдар ретінде оқитындықтан, түлектер алдында маңызды қадам – мамандық таңдау мәселесі тұр. Осыған орай, мекеме басшылығы жыл сайын қаладағы кәсіптік және техникалық білім беретін колледж өкілдерімен кездесу ұйымдастырып, оқушыларға бағыт-бағдар беруді дәстүрге айналдырған.
Биылғы кездесуде колледж өкілдері ерекше балаларға арналған жұмысшы мамандықтарын таныстырып, бейнероликтер арқылы кәсіптік білімнің артықшылықтарын көрсетті. Кәсіптік білім беру мекемелерінің көбі «Жас маман» бағдарламасы аясында толықтай жаңартылған. Олардың материалдық-техникалық базалары заманауи құралдармен жабдықталған, оқу шеберханалары мен зертханалары талапқа сай жасақталған. Оқушыларға тәжірибелі ұстаздар мен өндіріс мамандары дәріс береді, бұл оларға сапалы білім алып, болашақта өз қалаған кәсібін игеруіне мүмкіндік береді.
Кездесуге ата-аналар да қатысып, балаларының мамандық таңдаудағы мүмкіндіктері туралы мамандардан кеңес алды. Мұндай шаралар ерекше балалардың өз жолын дұрыс таңдауына көмектесіп, болашаққа деген сенімін арттырады.