Қазақстанның Энергетика министрлігі 2024–2025 жылдардағы жылыту маусымының қорытындысын шығарып, елдегі газбен қамту жүйесінің тұрақты жұмысын және табиғи газ тұтыну көлемінің артқанын атап өтті
Қазақстан Республикасы Энергетика министрлігінде Вице-министр Әлібек Жамауовтың төрағалығымен 2024–2025 жылдардағы күзгі-қысқы кезеңнің өту қорытындылары және алдағы жылыту маусымына дайындық шаралары бойынша кеңес өтті.
Кеңеске «QazaqGaz Aimaq» АҚ бас директоры Бауыржан Аскаров қатысты. Маусым қорытындысы бойынша елдің газ тасымалдау және газ тарату жүйелері тұтынушыларды тұрақты әрі үздіксіз газбен қамтамасыз етті. Қазіргі уақытта алдағы жылыту маусымына дайындық басталып кеткен. 2025 жылдың қаңтарында, яғни ең жоғары жүктеме кезеңінде, газдың сағаттық ең жоғарғы тұтыну көлемі 4 582 мың м³-ті құрады. Авариялық-диспетчерлік қызмет 46 мыңнан астам өтінімді өңдеді. 72,5 мың км-ден астам желі мен 35 мыңға жуық нысанды 4 мыңнан астам маман, оның ішінде тәулік бойы кезекшілік ететін бригадалар қамтамасыз етті.
– «Ішкі тұтыну көлемінің өсуіне және 2025 жылдың қаңтарын қоса алғанда, қысқы маусымда жүктеменің артуына қарамастан, газбен жабдықтау жүйелері тұрақты жұмыс істеді. Бұл барлық тартылған қызметтерді жүйелі дайындаудың және өзара тиімді жұмыстың нәтижесі», - деді вице-министр Әлібек Жамауов.
Сондай-ақ, ол «QazaqGaz Aimaq» АҚ-ға 2025–2026 жылдардағы жылыту маусымына дайындық аясындағы барлық іс-шараларды уақтылы аяқтауды тапсырды. Сонымен қатар, әлеуметтік қолдаудың қолжетімділігі мен ашықтығын арттыру құралы ретінде «Әлеуметтік әмиян» цифрлық сервисін республиканың бүкіл аумағында кеңінен енгізуді жеделдетіп жүзеге асыруды тапсырды.