Әлеуметтік желілерде ене мен келіннің беташар рәсіміндегі әрекеті қызу талқыға түсіп, жұртшылықтың ашуын тудырды, деп хабарлайды аlmaty-akshamy.kz.
Бейнежазбада келіннің бетін ашқан үлкен кісі шоколадтың жартысын өзі тістеп, қалған жартысын келініне бергені байқалады.
Бұл ерекше «тәтті сүйіске» этнограф Болат Бопай өз пікірін білдірді.
- Ене мен келіннің ауыз жаласуы қазақтың ырым-тыйымында жоқ. Қазақ ежелден денсаулыққа, тазалыққа ерекше мән берген, ер мен әйелдің орамалын ауыстырмаған. Келін мен енеге арналған жеке орамалдары болған. Видеоны көріп отырып, мұндай дәстүрдің болмағанын сенімді түрде айта аламын. Үнді киноларында қуанышты сәттерде кәмпитті бөлісіп жейтінін көрген едім. Бұл әдетті солардан алды ма, әлде өздері ойлап тапты ма, білмеймін. Мұндай әрекет халықтың мәдениетіне, дәстүріне, ырым-тыйымдарына қайшы келеді, ғасырлар бойы қалыптасқан тағылымды бұзу деп ойлаймын. Екіншіден, дем мен сілекей арқылы геннің ауысуы жүреді. Үшіншіден, гигиена тұрғысынан жұқпалы аурулардың таралу қаупі бар. Ене мен келіннің арасында сыйластық болу керек. Мен өз басым этнограф, ел ағасы ретінде айтарым - болмаған нәрсені салт-дәстүр деп қабылдауға болмайды, - дейді этнограф Болат Бопай.
Бұл оқиға қоғамда әртүрлі пікірлер тудырып, дәстүр мен заманауи әдет-ғұрыптар арасындағы шекараны анықтау мәселесін тағы да көтерді.