Сенат депутаттары Қазақстан мен Моңғолия үкіметтері арасындағы зейнетақы саласындағы ынтымақтастық туралы келісімді ратификациялау жөніндегі заңды қарап, қабылдады, деп хабарлайды Аqshamnews.kz тілшісі.
Құжат екі ел азаматтарының зейнетақы құқықтарын қорғауға бағытталған. Атап айтқанда, еңбек өтілін есепке алу, сондай-ақ зейнетақы төлемдерін тағайындау мен жүзеге асыру тәртібін нақтылайтын құқықтық тетіктерді қалыптастыруды көздейді.
Бұған дейін келісімнің маңызды жаңалығы ретінде Моңғолиядан келген қандастардың зейнетақы қорындағы жинағын Қазақстанға аудару мүмкіндігі қарастырылғаны айтылған. Бұл құжатқа 2024 жылғы 29 қазанда Ұлан-Батырда қол қойылып, кейін оны Мәжіліс ратификациялаған еді.
Ішкі істер министрлігінің мәліметінше, 2025 жылы Қазақстанға Моңғолияның 43 352 азаматы кіріп, 43 001 адам елден шыққан. Ал 2024 жылы 44 240 азамат кіріп, 40 916 адам шыққан.
Қазір Қазақстанда Моңғолияның 6 755 азаматы тұрақты тұрады, оның 6 236-сы – қандастар. 2025 жылы 979 адам тұрақты тұруға рұқсат алған. Сондай-ақ ҚР азаматтығын Моңғолияның 752 азаматы алған, олардың 744-і – қандастар.
