Түркияда балаларды ғаламтордың зиянды әсерінен қорғауға бағытталған жаңа ережелер әзірленіп жатыр, деп хабарлайды Aqshamnews.kz тілшісі.
Заңнамалық түзетулер қабылданғаннан кейін кәмелетке толмағандардың әлеуметтік желілерді қолдануына қатаң шектеу енгізілуі мүмкін.
Бастамаға сәйкес, 15 жасқа толмаған балаларға ата-анасының рұқсатын алса да әлеуметтік желіде аккаунт ашуға тыйым салынады. Бұл жастағыларға тек өз жасына сай онлайн ойындар мен цифрлық платформаларға қол жеткізуге рұқсат етіледі.
Сонымен бірге әлеуметтік желі платформаларына балалар қауіпсіздігін күшейту, интернетке тәуелділіктің алдын алу тетіктерін іске қосу міндеттелмек. Ойындарға толық тыйым салынбайды, алайда нақты жас рейтингі жүйесі енгізіліп, әр бала тек өз жасына сай контентті пайдалана алады.
Тағы бір талап – жасты тексеру жүйесін енгізу. Қолданушылардың жасын анықтау рәсімдері арнайы ережелермен бекітіліп, жасына сәйкес емес контентке қолжетімділік шектеледі. Бұған қоса ата-аналардың балалардың цифрлық ортадағы әрекетін бақылау құқығы кеңейіп, зиянды мазмұн туралы жедел шағым түсіруге арналған электронды жүйе құрылмақ.
Айта кетейік, Қазақстанда да 16 жасқа дейін жасөспірімдерге әлеуметтік желіде тіркелуге шектеу қою мәселесі қарастырылып жатыр. Бұл ұсыныс онлайн-платформалар мен БАҚ қызметін реттейтін заң жобасында қамтылып, құжат сараптамадан өтіп, қоғамдық талқылауға шығарылған.