Елдегі көші-қон процестерін реттеу бойынша 20-дан астам қызмет Еңбек және халықты әлеуметтік қорғау министрлігіне берілді. Бұл туралы Ішкі істер министрлігінің Көші-қон қызметі комитеті төрағасының орынбасары Сабыржан Сейітжанов мәлімдеді, деп хабарлайды Аlmaty-akshamy.kz
Оның сөзіне сүйенсек, тапсырылған міндеттердің ішінде «халықтың көші қон саласында ведомствоаралық үйлестіру», «көші-қон процестерінің мониторингі», «босқындармен жұмыс», «пана іздеушіге куәлік беру», «босқын мәртебесін тағайындау, оны ұзарту немесе тоқтату» функциялары да бар. Ал шетелдіктерге жұмыс істеу рұқсатын жергілікті атқарушы органдар ұсынады.
Ұсыну тәртібін Еңбек және халықты әлеуметтік қорғау министрлігі айқындайды. Дегенмен босқындар мен еңбек мигранттарының ел аумағына кіру және қалу ережесі Ішкі істер министрлігінің бақылауында болмақ.
– Еңбек және халықты әлеуметтік қорғау министрлігінің босқындармен жұмысы негізінен бұларға әлеуметтік көмек көрсетуге, медициналық қызмет көрсетуге және білім беруге бағытталатын болады. Босқындармен жұмыс істеу кезінде БҰҰ босқындар ісі жөніндегі Жоғарғы комиссар басқармасы, халықаралық көші-қон ұйымы сияқты бұқаралық құрылымдармен, үкіметтік емес ұйымдармен өзара тығыз іс-қимыл жүргізіледі, - дейді ҚР ІІМ Көші-қон қызметі комитеті төрағасының орынбасары Сабыржан Сейітжанов.