Әйгілі әнші Дженнифер Лопестің вокалисі Шэрон Янгблад парақшасында Қазақстан жайлы әсерін әлі де бөлісіп жатыр. Бұл жолы ол елден әкелген қазақстандық шоколадты АҚШ-тағы туыстарына үлестіргенін айтты, деп хабарлайды Aqshamnews.kz тілшісі.
Шэрон гастрольдік сапар кезінде Алматыға келіп, алғаш рет жергілікті тәттілерді жеп көргенін, жанкүйерлер оған қорап-қорап шоколад сыйлағанын жеткізді.
"Мені көптен бері бақылайтындар біледі: Қазақстан халқымен арада ерекше жақындық қалыптасты. Елге де, адамдарға да ғашық болдым. Сол себепті сол жақтан алған сыйлықтарымды бөліскім келді. Қазақстандық қара шоколад – өмірімде жеп көрген ең үздік тәттілердің бірі", – деді Янгблад.
Жарияланған видеода оның туыстары қазақстандық шоколадтың дәмін татып көріп, жоғары баға берді.
"Таңғажайып! Біздің шоколадқа мүлде ұқсамайды, мүлдем бөлек. Бұл – мен жеп көрген ең керемет қара шоколад", – дейді вокалистің туысы.
Басқалары да "бұған дейін мұндай дәмді шоколад жеп көрмегенін», "ең ұнатқан тәттілерінің біріне айналғанын" айтты.
Еске салайық, бұған дейін Шэрон Алматыға келгенде қазақстандық шоколадтты қатты ұнатып қалғанын айтып, кейін қонақ үй қызметкерлері оның нөміріне отандық өндірушіден келген тәттілердің қомақты қорын жеткізіп берген еді.