Дженнифер Лопестің командасында өнер көрсететін америкалық әнші Шэрон (@sharonyoungblood) Алматыға гастрольдік тур аясында келіп, елге деген жылы лебізін білдірді, деп хабарлайды Aqshamnews.kz.
Ол әлеуметтік желіде ұлттық нақыштағы көк қаптамадағы «Kazakhstan» қара шоколадының суретін жариялап:
"Мұндайды қайдан табамын? Өмірімдегі ең дәмді қара шоколад!"деп жазған.
Бұл жазба әлеуметтік желіде тез тарады. Алматы тұрғындары әншінің видеосын жарыса бөлісіп, пікір қалдырды. Көп ұзамай қонақ үй қызметкерлері оның нөміріне отандық өндірушіден келген тәттілердің қомақты қорын жеткізіп берді.
"Қазақстан, сіздердің қонақжайлылықтарыңыз – керемет", — деп алғысын білдірген Шэрон достарын да осы тәттімен қуантатынын айтты.
Бұған дейін ол Қазақстанға екінші рет келіп отырғанын және әр сапарында елді жаңа қырынан танып жатқанын жеткізген.
"Қазақстан – ғажайып. Бүгін біз Алматыдамыз, мына көрініске қараңыздаршы! Міндетті түрде отбасымды ертіп, демалысқа қайтып келемін", — деді Шэрон.
Айта кетейік, 10 тамыз күні Алматыда Дженнифер Лопестің концерті өтеді. Қазіргі таңда сахна құрастырылып, дайындық қызу жүріп жатыр.