Еліміздің әуе кеңістігінде екі халықаралық жолаушылар ұшағы соқтығысып қала жаздады. Бұл уақытта екі рейс Шымкент аймақтық диспетчерлік орталығының аймағында болған. Оқыс оқиғаға қатысты Көлік министрлігі тергеу жүргізуді қолға алды, деп хабарлайды Aqshamnews.kz тілшісі Elordainfo.kz-ке сілтеме жасап.
Көлік министрлігінің баспасөз қызметі аталған жағдайды былай түсіндірді:
«10 қаңтар күні Астана уақыты бойынша шамамен сағат 05:42-де Шымкент аймақтық диспетчерлік орталығы аймағында «Победа» әуе компаниясының Внуково-Самарқанд бағыты бойынша ұшқан PBD997 рейсіне және «Uzbekistan Airways» әуе компаниясының Термез-Мәскеу бағыты бойынша ұшқан UZB9609 рейсіне қызмет көрсету кезінде авиациялық оқыс жағдай болды», - деп жазылған хабарламада.
Министрлік авиациялық оқиғаның себептерін анықтау үшін арнайы комиссия құрып жатыр.
Ведомство таратқан мәліметке сүйенсек, егер қосымша сараптамаларға қажеттілік туындамаса тергеу 3 айда аяқталуға тиіс.