«Қазгидромет» 2026 жылғы 21-23 наурыз аралығына арналған Қазақстан бойынша ауа райы болжамын ұсынды. Синоптиктердің мәліметінше, елдің бірқатар өңірінде жаңбыр мен қар аралас жауын-шашын, тұман, көктайғақ және желдің күшеюі күтіледі, деп хабарлайды Aqshamnews.kz тілшісі.
Синоптиктердің болжамынша, 21-23 наурыз күндері Қазақстанның солтүстігінде және оңтүстік өңірлерінің бір бөлігінде атмосфералық фронттардың өтуіне байланысты жауын-шашын болады. Кей жерлерде жаңбыр мен қар аралас түсіп, жел күшейеді. Ал күндіз оңтүстік аймақтарда найзағай болуы мүмкін. Сонымен қатар республика бойынша тұман мен көктайғақ күтіледі.
Елдің қалған аумағында негізінен жауын-шашынсыз ауа райы сақталады. Ауа температурасы күндіз батыс өңірлерде 12-17 градусқа дейін жылынады. Маңғыстау облысында 18-23 градусқа дейін жылу болады деп күтіліп отыр.
Солтүстік пен орталық аймақтарда күндізгі ауа температурасы 3-8 градус жылы болады. Ұлытау облысында бұл көрсеткіш 15-20 градусқа дейін көтеріледі. Шығыс Қазақстанда 5-15 градус жылу күтілсе, оңтүстікте 20-25 градусқа дейін, ал оңтүстік-шығыста 15-23 градусқа дейін жылиды.