Төрт ай ішінде Қазақстанда адам саудасының 30-ға жуық фактісі тіркелді.
Бұл туралы Ішкі істер министрі Марат Ахметжанов адам саудасына қарсы іс-қимыл мәселелері жөніндегі құқықтық форумда айтты, деп хабарлайды Almaty-akshamy.kz.
«Біріккен Ұлттар Ұйымының мәліметі бойынша, әлемдегі адам саудасының құрбандарының 70%-ы әйелдер мен жас қыздар. Ал әрбір үшіншісі - бала. Өкінішке қарай, бұл мәселе Қазақстанға да қатысты», деді Марат Ахметжанов.
Оның айтуынша, жыл сайын елде ұқсас сипаттағы 100-ден астам қылмыс тіркеледі.
«Бұрын мұндай қылмыстардың 300-ге жуығы тіркелген. Биыл төрт айда адам саудасының 30-ға жуық фактісі анықталды. Үш ұйымдасқан қылмыстық топ ұсталды. Жалпы, министрлікте ұйымдасқан қылмысқа қарсы күрес басқармасын қайта ұйымдастырудың арқасында бұл қылмыстардың анықталуы артып келеді», - деп толықтырды министр.