Елдегі еріктілер қозғалысының қатары жыл сайын толыға түсуде.
Бүгінде аймақтарда 20 фронт кеңселер жұмыс істейді. Биыл онда 10 мыңнан астам волонтер арнайы оқытудан өткен, деп хабарлайды Almaty-akshamy.kz 24.kz-ке сілтеме жасап.
Ал «Қазволонтер» платформасында 70 мың адам тіркеліп, 72 жобаны жүзеге асырған. Қазақстанның бұл бағыттағы тәжірибесін бірқатар Орта Азия елдері қабылдауға ниетті. Халықаралық волонтерлер күні қарсаңында өткен форумда еліміздің еріктілер қозғалысын дамытудағы тәжірибесі талқыланды. Жиынға көрші мемлекеттерден үкіметтік емес ұйым өкілдері қатысып, елдегі волотерлік ұйымдардың жұмысымен танысты.
«Қазақстан тарапының қаржыландырумен 2020 жылдан бастап Қазақстанның азаматтары Біріккен Ұлттар Ұйымының бағдарламасы бойынша басқа елдерде волонтер болып жұмыс істеп жатыр. Олар Түркияда, Африка елдерінде жұмыс істеуде. Бұл бағдарлама ары қарай жалғасады. Қазақстан 7 адамды басқа елдерде көмек көрсе үшін ерікті ретінде жібереді», - дейді ҚР Мәдениет және ақпарат вице-министрі Данияр Қадыров.
«Қазақстан азаматтары шетелде волонтер ретінде көмек көрсеткісі келсе, ел Үкіметі бұған қолдау көрсетеді. Бұның өзі Қазақстанның еріктілер қозғалысы халықаралық деңгейге шыққанының дәлелі. Бұдан бөлек, Қазақстанда үздік волонтерлерге арнайы сыйлық қарастырылған. Осының өзі ел Үкіметінің бұл салаға үлкен мән беретінінін көрсетеді», - дейді БҰҰ волонтерлер бағдарламасының консультациялық қызметтер секциясының басшысы Тапива Камуруко.