Қазақстандықтар Ішкі істер министрлігіне электроскутерлерді жалға беруге тыйым салуды сұрап, петиция жолдады, деп хабарлайды aqshamnews.kz
Петиция авторлары электросамокаттардың жаяу жүргіншілер үшін қауіпті жағдай туғызатынын және олардың қозғалысына кедергі келтіретінін атап өтті. Олар бұл мәселені шешу үшін электросамокаттарды жалға беру қызметіне тыйым салуды сұрауда.
Жаңа петиция epetition.kz сайтында жарияланды. Оның авторы бұл қызметтің қаладағы қозғалыс тиімділігін арттыру, кептелістерді азайту және көлік шығындарын төмендету секілді артықшылықтарын атап өтеді.
Алайда, электросамокаттардың қала көшелерінде пайда болуы Алматыда жаяу жүргіншілердің қозғалысын қауіпті және ыңғайсыз еткенін алға тартады.
Петицияда электросамокаттардың жаяу жүргіншілер аймақтарымен жүруі, балалар мен ересектердің қауіпсіздігін қатерге тігуі туралы жазылған. Автордың айтуынша, Алматыда бұл жағдайды реттеу шаралары жеткіліксіз болып отыр, тіпті заңнамалық өзгерістер де әсерін тигізбеген.
Авторлар Париж қаласындағы тәжірибені мысалға келтіріп, ол жақта электросамокаттарды жалға алуға тыйым салынғанын, себебі бұл қала тұрғындарының қауіпсіздігіне зиян келтіргенін алға тартады.
Қазақстандықтар да осыған ұқсас шара қабылдау арқылы жаяу жүргіншілердің қауіпсіздігін қамтамасыз етуді сұрайды.