Ел аумағындағы күл үйінділерінің көлемі 1,41 млрд текше метрге жеткен.
Энергетика министрі Ерлан Ақкенженов Үкімет отырысында осындай дерек келтірді, деп хабарлайды aqshamnews.kz.
— Бүгінгі таңда елімізде 227 электр станциясы жұмыс істейді. Бұл ретте оның ішінде көмірді негізгі отын ретінде пайдаланатын ірі энергия өндіруші ұйымдардың саны — 21. Осы энергия өндіруші ұйымдар ауданы 18,2 мың гектар 27 күл үйіндісін пайдаланады. Күл үйінділерінің жалпы көлемі — 8,23 млрд текше метр, оның 1,41 млрд текше метрі толтырылды. 2024 жылы күлді өңдеумен айналысатын компаниялар 69,2 мың тонна күлді өңдеді, — деді ол.
Сондай-ақ, министр күлді өңдеу әсіресе цемент пен бетон өндіру саласына тән екенін айтты.
— Қазақстанда күлдің құрамы өнеркәсіп талаптарына сәйкес келмейді. Қазақстандық жылу энергия орталықтары мен мемлекеттік аудандық электр станциялары негізінен құрамында жанбайтын қоспалары жоғары қоңыр және тас көмірді пайдаланады. Сондай-ақ, күл-қож қалдықтарында күкірт қосылыстары мен сынап, қорғасын, мышьяк сияқты ауыр металдар бар, бұл құрылыстағы күлдің құнын төмендетеді. Осыған байланысты қосымша тазалау және қайта өңдеу қажет, бұл соңғы өнімнің өзіндік құнын арттырады, — деді Ерлан Ақкенженов.