Қазіргі заманда қоқыс – тек тұрмыстық қалдық емес, қайта өңделіп, пайдалы өнімге айналатын құнды ресурс. Экологиялық мәдениетті бала кезден қалыптастыру – болашақ ұрпақтың табиғатқа деген жауапкершілігін арттырады.
Алматы қаласындағы №202 мектеп-гимназияның 2 «Ә» сынып оқушылары қоқысты қайта өңдеудің маңыздылығын шығармашылық жолмен көрсетті. Олар тұрмыстық қалдықтарды мүмкіндігінше қайта өңдеп, түрлі бұйымдар жасап шықты.
Көрмеге қойылған бұйымдардың әрқайсысы – балалар қиялы мен еңбегінің нәтижесі. Бірі әуе шары, бірі самаурын, тіпті киіз үй, үй жануарлары, ыдыс-аяқ, өсімдіктер мен үйге қажетті жабдықтарға дейін жасаған. Әр туынды тек эстетикалық мәнге ие емес, сонымен қатар экологиялық ой салады.
Сынып жетекшісі Гүлфайрус Нұрлыбекқызының айтуынша, бұл шараға балалар өз еркімен, ерекше қызығушылықпен қатысқан.
«Шараның басты мақсаты – оқушылардың экологиялық сауатын арттыру, айналаны таза ұстауға баулу және «Таза Қазақстан» акциясына қолдау көрсету», – дейді ұстаз.
Мектептің бастауыш сыныптар кафедрасының жетекшісі Айнұр Тоқтасынқызы да жас шеберлердің еңбегіне жоғары баға беріп, олардың шығармашылығы мен ойлау қабілетіне тәнті болғанын жеткізді.
«Кейбір бұйымдар адам ойына келе бермейтін ерекше идеялармен жасалған», – деп атап өтті ол.
Экологиялық мәдениетті бала жасынан қалыптастыру – болашақ ұрпақтың саналы азамат болып өсуіне негіз болады. Бұл орайда Ерназар Шахназ есімді оқушының пікірі ой салады:
«Мен өзім тұратын қаланы әрдайым таза күйінде көргім келеді. Ол үшін жауапкершілікті әр адам өзінен бастауы керек. Мысалы, су ішсең – бөтелкесін қоқыс жәшігіне таста, кәмпит жесең – қағазын жерге тастама. Бәріміз осы әдетті ұстансақ, қалада шашылған қоқыс болмас еді», – дейді ол.
Көрмеге оқушылар дайындаған 50-ден астам бұйым қойылды. Жас шеберлер мектеп басшылығы мен көрермендерге өз жұмысы туралы айтып, бұйымдарды дайындау барысымен таныстырды.
Оқушылардың қарапайым қоқыстан әдемі әрі пайдалы бұйымдар жасауы – шығармашылық пен экологиялық тәрбиенің керемет үйлесімі. Мұндай шаралар балалардың бойында табиғатқа жанашырлықпен қарау, тазалық сақтау, ысырапқа жол бермеу секілді маңызды дағдыларды қалыптастырады.
Қалдықты қайта өңдеуге болатын дүние деп қабылдау – тек көзқарас емес, үлкен мәдениеттің көрінісі. Балалардың бойынан осындай қасиеттің табылып жатқаны, әрине, қуанарлық жайт
