Әлеуметтік желі мен Telegram-арналарда Дубайда жарылыс болғаны туралы ақпарат тарады. Кейін қала билігі ғимаратқа зымыранның бөлшектері түскенін мәлімдеді, деп хабарлайды Aqshamnews.kz тілшісі.
Алдын ала тараған мәліметтерде Dubai International Financial Centre маңында жарылыс болып, оқиға орнында түтін байқалғаны және ғимараттың әйнектері сынғаны жазылды. Алайда кейін Дубай билігі бұл жағдайға зымыранды әуе қорғанысы жүйесінің сәтті ұстап қалуынан кейін түскен бөлшектер себеп болғанын нақтылады.
Ресми мәліметке сәйкес, Дубай орталығындағы ғимараттардың бірінің қасбетіне ұсталған нысанның бөлшектері тиіп, аздаған зақым келген. Зардап шеккендер туралы ақпарат түспеген.
Бұған дейін БАӘ әуе қорғанысы жүйелері елге бағытталған бірнеше зымыранды сәтті залалсыздандырғанын хабарлаған еді.