Disney студиясының тағы бір туындысы қазақша дыбысталды.
Астанада «Моана 2» анимациялық фильмі қазақ тілінде көрермен назарына ұсынылды, деп хабарлайды aqshamnews.kz 24.kz-ке сілтеме жасап.
Фильм Халықаралық «Қазақ тілі» қоғамының ұйымдастыруымен дубляждалған. Дубляж режиссері – Шах-Мұрат Ордабаев. Музыкалық жетекші – Анель Сіргебаева.
Disney жыл сайын фильмдердің әр түрлі тілдегі нұсқасын дайындайды. Соның аясында «Қазақ тілі» қоғамының ұйытқысымен биылдан бастап ірі халықаралық студиялар әлемдік премьераларын қазақ тілінде ұсына бастады.
Рауан Кенжеханұлы, Халықаралық «Қазақ тілі» қоғамының президенті: - Disney, Pixar бұлар дүниежүзіне жаңа фильм шығарған кезде 30 шақты фильмге, әлемдегі үлкен фильмдерге өз қаражатын аударып таратады. Сондай тілдердің қатарына қазақ тілі де қосылып отыр. Бұл біз үшін үлкен жеңіс. Биылғы жылы «Ойжұмбақ 2» шықты, жақында «Веном 2» қазақша шықты, бүгін, міне, «Моана 2» таныстырылды, желтоқсан айында «Муфаса. Арыстан патша» шығады. Келесі жылдың басында «Ақшақар шығады».