Диляра Қайдарованың айтуынша, жаңартылған заң азаматтардың денсаулығын қорғау саласындағы мемлекеттік кепілдікті нығайтып, отандық ғылымды дамытуда жаңа мүмкіндікке жол ашады, – деп хабарлайды aqshamnews.kz тілшісі.
Қазақстан Республикасы Президенті жанындағы Ұлттық ғылым академиясының академигі, С.Ж. Асфендияров атындағы Қазақ ұлттық медицина университетінің бірінші проректоры, медицина ғылымдарының докторы, профессор Диляра Қайдарова қазақстандықтарды Қазақстан Республикасының жаңа конституциясының күшіне енуімен құттықтап, оның денсаулық сақтау жүйесін, ғылым мен инновацияларды одан әрі дамытудағы айрықша маңызын атап өтті.
«Бұл – еліміз үшін тарихи күн. Қазақстан Республикасының жаңа конституциясы күшіне енді. Денсаулық сақтау саласына 30 жылдан астам ғұмырын арнаған маман ретінде азаматтардың денсаулығын қорғауға арналған 32-баптың ерекше маңызын атап өткім келеді. Аталған бап әр қазақстандықтың тегін медициналық көмек алу құқығын бекітеді», – деді ол.
Қайдарованың айтуынша, міндетті әлеуметтік медициналық сақтандыру жүйесін дамыту халықтың сапалы медициналық көмек пен емдеудің осы заманғы әдісіне қолжетімділігін одан әрі кеңейтуге мүмкіндік береді.
Академиктің айтуынша, жаңа конституцияда ғылымды дамытуға, жас зерттеушілерді қолдап, озық технологияны енгізуге көп көңіл бөлінген.
«Ғылыми қауымдастық үшін бұл – маңызды қадам. Жаңа конституция жас ғалымдардың дамуына, жасанды интеллект технологияларын енгізіп, Қазақстан ғылымын жаңа деңгейге көтеріп, оның халықаралық бәсекеге қабілеттілігін арттыратын перспективалы ғылыми жобаларды жүзеге асыруға берік негіз болады деп сенеміз», – дейді Диляра Қайдарова.
Сөз соңында ол жаңа конституция денсаулық сақтау жүйесін одан әрі нығайтуға, елдің ғылыми әлеуетін дамытып, азаматтардың өмір сүру сапасын арттыруға ықпал етіп, қуатты Қазақстанды құрудың маңызды құқықтық негізіне айналатынына сенім білдірді.