Алматы қалалық Қоғамдық кеңесінің мүшесі Дидарбек Ділдәбек Жаңа Конституцияның қабылдануы елдегі саяси реформалардың маңызды кезеңі екенін атап өтті, – деп хабарлайды aqshamnews.kz тілшісі.
Оның айтуынша, Конституцияны қабылдау үдерісінде қоғамдық ұйымдар мен белсенді азаматтар белсенді жұмыс атқарды. Сонымен қатар Алматы қаласында Конституцияның маңызын түсіндіруге бағытталған түрлі іс-шаралар ұйымдастырылып, жастардың қатысуымен бірқатар ақпараттық және танымдық жобалар жүзеге асырылуда.
«Жаңа Конституция - бұл халықтық Конституция. Оның қабылдануы елімізде маңызды өзгерістерге жол ашады. Саяси реформалар кезең-кезеңімен жүзеге асып жатыр, алдағы уақытта олардың нәтижесі қоғамның дамуына оң әсер етеді», – деді Дидарбек Ділдәбек.
Қоғамдық кеңес мүшесі Конституцияның тиімді жүзеге асуы әрбір азаматтың белсенділігіне байланысты екенін айтты. Оның пікірінше, мемлекеттің тұрақты дамуы қоғам мен биліктің өзара ынтымақтастығына негізделеді.
«Мемлекет ешқашан өздігінен дамымайды. Ол қоғаммен бірге өседі. Сондықтан әрбір азамат Жаңа Конституцияның мәнін түсініп, оның іске асуына өз үлесін қосуы қажет. Сонда ғана ортақ мақсаттарымызға қол жеткізе аламыз», – деп түйіндеді ол.