№11 қалалық емханада Ашық есік күні өтті
1 маусым – Халықаралық балаларды қорғау күні қарсаңында және республикалық “Дәрігер – балалардың жанашыры” акциясы аясында №11 қалалық емханада С.Д. Асфендияров атындағы Қазақ ұлттық медицина университетінің профессорлық-оқытушылық құрамының қатысуымен Ашық есік күні ұйымдастырылды, деп хабарлайды aqshamnews.kz
Іс-шараның мақсаты – балаларға кеңестік-диагностикалық көмек көрсету, сондай-ақ ата-аналарға баланың денсаулығына жауапкершілікпен қарау, мамандарға уақытылы жүгіну қажеттілігі туралы түсіндіру жұмыстарын жүргізу болды.
Күн бойы ҚазҰМУ-дың балалар медицинасы саласындағы жеті түрлі бейінді маманы – профессорлар, медицина ғылымдарының кандидаттары және жоғары санатты дәрігерлер – кішкентай пациенттерге тексеру жүргізіп, кеңес берді.
Атап айтқанда, іс-шараға балалар эндокринологы, кардиоревматолог, аллерголог-пульмонолог, инфекционист, хирург, гастроэнтеролог және педиатр қатысты.
№11 қалалық емханасы мұндай іс-шараларды дәстүрге айналдырған. Мұнда балалар ауруының алдын алуға, ерте диагностика жүргізуге және ата-аналардың баланың денсаулығына саналы көзқарас қалыптастыруына ерекше көңіл бөлінеді.
Балаларды қорғау күні – бұл тек мереке ғана емес, әрбір баланың құқығы мен саулығын сақтау қажеттігін еске салар маңызды күн. Барша бала сүйіспеншілікте, қауіпсіз ортада, ең бастысы – аман-сау өссін!