Алматы әкімдігінде қала әкімі Дархан Сатыбалды Orascom Investment Holding холдингінің төрағасы, халықаралық инвестор Нагиб Савириспен кездесті.
Дархан Сатыбалды Алматының сауда-экономикалық байланысы 130-дан астам елмен орнағанын атап өтті. Қала көпжақты халықаралық ынтымақтастықтың өңірлік орталығы саналады. Алматыда 115 халықаралық ұйым мен дипломатиялық өкілдіктің, оның ішінде Біріккен Ұлттар Ұйымының 18 өңірлік агенттігінің кеңсесі орналасқан. Сондай-ақ, Қазақстандағы екінші деңгейлі банктердің 90%-ының бас кеңсесі дәл осы шаһарда шоғырланған. Бұдан бөлек, ел экономикасының 22%-дан астамы Алматыға тиесілі, республикалық бюджетке түсетін салық түсімдерінің төрттен бірінен астамын қамтамасыз етеді.
Кездесу барысында қала әкімі туризм мен кәсіпкерлікті дамыту басым бағыттардың бірі екенін айтып, бизнес жүргізуге қолайлы жағдай жасалғанын жеткізді.
Сондай-ақ, соңғы үш жылда Алматыға келетін туристер саны 92%-ға артқаны, ал қарбалас маусымда қонақүйлердің жүктемесі 90%-ға дейін жететіні айтылды. Бұл көрсеткіштер қалада туристік инфрақұрылымды одан әрі дамытуға сұраныстың жоғары екенін айғақтайды.
Кездесу қорытындысы бойынша Нагиб Савирис Алматының инвестициялық әлеуетін тереңірек зерделеуге және ынтымақтастықтың болашағы зор бағыттары бойынша диалогты жалғастыруға қызығушылық білдірді.