Coldplay концертінде бас директор мен әріптесінің видеосын түсірген әйел одан қандай табыс тапқанын айтты, деп хабарлайды aqshamnews.kz UNILAD.com сайтына сілтеме жасап.
Astronomer компаниясының бас директоры Энди Байрон мен оның әріптесі Кристин Кэботтың Coldplay концерті кезінде құшақтасып тұрған сәтін видеоға түсіріп алған Грейс Спрингер бұл роликтен ешқандай табыс таппағанын мәлімдеді.
Ол бұл туралы This Morning бағдарламасына қатысып, жүргізушілер Дермот О’Лири мен Элисон Хаммондқа берген сұхбатында айтты.
«Мен бұл видеодан да, оның қаралымдарынан да ақша таппадым. Себебі ол монетизацияға қосылмаған», – деді ол.
Оқиға Фоксборо қаласындағы Gillette стадионында Coldplay тобының концерті кезінде болған. Бұл сәт 50 мың көрерменнің көз алдында экранға шыққан. Құшақтасу желіде үлкен талқыға түсіп, даулы мәселеге айналды. Себебі Энди Байрон басқа әйелге – Меган Керриган Байронға үйленген.
Coldplay тобының вокалисі Крис Мартин бұл жағдайға әзілмен:
«Бұлар не ғашық, не өте ұялшақ адамдар», – деп сипаттады.
Грейс Спрингер бастапқыда экраннан өзін көргісі келгенін мойындады:
«Мен тек сол сәтті түсіріп жатқан едім. Ол кезде аса мән бермедім, бірақ кейін бәрі осы видеоны талқылап жатқанын аңғардым», – деді ол.
Кейін видеоны достарымен қайта көргенде, бұл көрініс сырт көзге күмән тудыратынын түсінген. Журналистер қойған «Өкінесіз бе?» деген сұраққа ол Байронның әйелі мен отбасына жанашырлықпен қарайтынын, бірақ:
«Мұны тек мен ғана түсірген жоқпын. Мен түсірмесем, басқа біреу түсірер еді», – деп жауап берді.
Желіде жарияланған видеодан кейін, Astronomer компаниясы ішкі тексеру жүргізіп, екі қызметкер де жұмыстан уақытша шеттетілді. Кейін Энди Байрон отставкаға кетті. Компания мәлімдемесінде ұйым басшылығының жоғары этикалық стандарттарға сай жұмыс істеуі міндет екені айтылған. СЕО компаниясының уақытша бас директор қызметін компанияның негізін қалаушылардың бірі – Пит ДеДжой атқарады.