Бүгін БҰҰ Бас Ассамблеясы 152 елдің бірлескен авторлығымен Орталық Азия мен Ауғанстан үшін Орнықты даму мақсаттары жөніндегі БҰҰ-ның аймақтық орталығын Алматыда ашу туралы қарарды консенсус негізінде қабылдады, деп хабарлайды aqshamnews.kz.
Бұл маңызды шешім Қазақстанның халықаралық аренадағы маңызды жетістіктерінің бірі болып табылады. Ақорда бұл қарардың қабылдануын еліміздің сыртқы саясаттағы айтарлықтай табысы ретінде атап өтті. Қазақстанның халықаралық ынтымақтастық пен аймақтық тұрақтылықты нығайтуға бағытталған бастамалары өз нәтижесін беруде.
Қазақстан Президенті, барлық серіктестеріне осы тарихи оқиғаны қолдағандары үшін алғыс білдіріп, аймақтық орталықтың ашылуы Орталық Азия мен Ауғанстан елдеріне орнықты даму мақсаттарына жетуде үлкен мүмкіндік беретінін атап өтті. Мемлекет басшысының пікірінше, БҰҰ-ның Аймақтық хабы халықаралық іс-қимылды үйлестірудің маңызды алаңына айналып, аймақтағы елдер арасында өзара түсіністік пен серіктестікті нығайтуға ықпал етеді.
Қазақстанның бастамасымен ашылатын бұл орталық аймақтық даму мен тұрақтылықты қамтамасыз ету үшін маңызды рөл атқаратын болады. Орнықты даму мақсаттарын іске асыруда БҰҰ мен оның серіктестері арасындағы тиімді ынтымақтастықтың нығаюы, сондай-ақ, Қазақстанның аймақтағы жетекші рөлін айқындап отыр.