Қазақстанда медицина қызметкерлеріне жасалған шабуылды полиция қызметкерлеріне жасалған шабуылмен теңестіріп, сондай жаза қолдану қажет. Бұл туралы вице-премьер Ермек Көшербаев мәлімдеді, - деп хабарлайды Аqshamnews.kz тілшісі.
Медицина қызметкерлеріне шабуыл жасағандар қатаң жазаланады
Үкіметтегі брифинг барысында Көшербаев медицина қызметкерлеріне шабуыл жасау мәселесі қазақстандық қоғамды дүр сілкіндіргенімен, бұл жағдай бұрыннан бар екенін еске салды. Оның айтуынша, он жыл бұрын жедел жәрдем көліктерінің жолын бөгейтіндер көбейе бастаған. Кейін бұл әрекеттер қол жұмсауға дейін жеткен. Шенеунік пікірінше, мұндай әрекетке көбіне өзінікі дұрыс деп санайтын адамдар барады.
"Қазір дәрігерлер мен медбикелерге кәсіби міндетін атқару кезінде күш қолдану оқиғалары кездесіп отыр. Мемлекет басшысының тапсырмасына сәйкес, біз депутаттық корпуспен бірлесе отырып, мұндай әрекеттер үшін қылмыстық жауапкершілікті күшейтетін заңнамалық өзгерістер пакетін әзірледік. Яғни медицина қызметкеріне шабуыл жасау – қызметтік міндетін атқарып жатқан құқық қорғау органының қызметкеріне шабуыл жасаумен теңестірілуге тиіс. Бұл әділетті шешім деп ойлаймын", – деді Ермек Көшербаев.
Айта кетейік, бұған дейін Қарағандыда бір пациент жеке клиника дәрігеріне шабуыл жасаған еді. Оқиға медициналық мекеме ғимаратында орын алып, бейнежазба әлеуметтік желілерде тез тарап кеткен.