Қазақстанда қызды тұрмысқа шығуға зорлап мәжбүрлеу үшін қылмыстық жауапкершілік ресми түрде енгізілді, - деп хабарлайды Аqshamnews.kz тілшісі.
ІІМ мәліметінше, 16 қыркүйектен бастап елімізде азаматтардың құқығын қорғауды күшейтетін Қылмыстық заңнамаға өзгерістер күшіне енді.
Негізгі өзгерістердің бірі – Қылмыстық кодекстің 125-бабындағы ескертпені алып тастау. Бұған дейін жәбірленушіні өз еркімен босатқан адам қылмыстық жауапкершіліктен құтыла алатын. Енді бұл мүмкіндік жойылды: кінәлілер кейінгі әрекеттеріне қарамастан жазаланады.
Неке қиюға мәжбүрлеу туралы жаңа бап
Кодекске 125-1-бап «Неке қиюға мәжбүрлеу» енгізілді. Енді мұндай әрекет қылмыстық құқықбұзушылық болып саналады. Жағдайға байланысты жаза 2000 АЕК-ке дейін айыппұл, түзеу немесе қоғамдық жұмыстар, бостандықты шектеу не екі жылға дейін бас бостандығынан айыруды қамтуы мүмкін.
Егер қылмыс салдарынан абайсызда ауыр зардап келсе, бес жылдан он жылға дейін бас бостандығынан айырылуы мүмкін. Егер зорлықпен мәжбүрленсе, кәмелетке толмағандарға қатысты болса, топпен жасалса, қызметтік өкілеттігін немесе жәбірленушінің тәуелділігін пайдаланса, қатаңырақ шаралар қолданылады.
Құқық қорғаушылардың айтуынша, әрбір мұндай жағдай – тек заңбұзушылық емес, қыз бен оның отбасы үшін ауыр сынақ. Жәбірленушілер тек физикалық және психологиялық зорлыққа емес, сонымен қатар, «отбасыңды ұятқа қалдырма» деп қысым көрсететін туыстарының сөзіне тап болады.
Ауыр психологиялық зардаптар
Мамандардың айтуынша, мұндай оқиғалардан кейін қыздарда мазасыздық, депрессия, үрей және айналасындағыларға сенімсіздік қалыптасады.
Еске салайық, 16 шілдеде Президент Қасым-Жомарт Тоқаев «Қазақстан Республикасының қылмыстық заңнамасын оңтайландыру мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заңға қол қойған болатын. Сол түзетулердің бірі – қалыңдықты ұрлау үшін қылмыстық жаза енгізу еді.