Туризм және спорт вице-министрі Серік Жарасбаев Қазақстан құрамасының XXV қысқы Олимпиада ойындарындағы алғашқы нәтижелеріне баға берді, - деп хабарлайды aqshamnews.kz тілшісі Bestnews.kz-ке сілтеме жасап.
— Серік Маратұлы, Олимпиада-2026 ойындарында Қазақстан спортшыларының алғашқы өнер көрсетуін көрдік. Сіздің пікіріңіз қандай?
— Жарыстардың едәуір бөлігі артта қалды. Мәселен, фристайл-могулдан өткен сайыстардың нәтижелерін көріп отырмыз, шорт-трекшілеріміз алғашқы қашықтықты жүгіріп өтті. Мәнерлеп сырғанаушы Михаил Шайдоров қысқа бағдарламадан кейін бесінші орын алып, әлемдегі үздік мәнерлеп сырғанаушылардың ТОП-5 қатарына енді. Ертең Михаил еркін бағдарламамен өнер көрсетеді. Айта кетейік, Софья Самоделкина (әйелдер арасындағы жеке сырғанау – ред.) әзірге жарысқа шыққан жоқ.
Бұдан бөлек, осы Олимпиадада алғаш рет жарыс бағдарламасына қосымша параллель могул енгізілді. Бұл сайыста құрамамыздың көшбасшысы, осы дисциплина бойынша әлем чемпионы Анастасия Городко өнер көрсетеді. Оның Олимпиадада өзін сәтті танытуын тілейміз.
Сондай-ақ, шорт-тректен Денис Никишаның өзіне тән негізгі қашықтығы – 500 метрдегі жарысын күтеміз. Үмітіміз конькимен жүгірушілерге де зор: Олимпиада аяқталар қарсаңында олар 1500 метр қашықтықта бақ сынайды.
Командамызға сенеміз, жанкүйер боламыз, үміт үзбейміз, бәріне сәттілік тілейміз. Біз спортшыларымызға сенеміз.