2025 жылы Қазақстанда бала тууға және бір жарым жасқа дейін күтім жасауға арналған мемлекеттік жәрдемақыларды жалпы 508 мың азамат алды. Бұл мақсатқа 692 миллиард теңге бөлінген, деп хабарлайды Aqshamnews.kz тілшісі.
Еңбек және халықты әлеуметтік қорғау министрлігінің мәліметінше, жыл басынан бері республикалық бюджеттен 286 мың адамға бала туу бойынша жәрдемақы төленді. Төлемдердің жалпы көлемі 51,7 миллиард теңгені құрады. Тек қазан айының өзінде 28,5 мың азаматқа 5,2 миллиард теңге берілген.
Бұл жәрдемақы Қазақстан азаматтарына, қандастарға, сондай-ақ туған, асырап алынған немесе қамқорлыққа берілген балалары бар шетелдіктерге тиесілі.
Бір жарым жасқа дейін бала күтімі үшін, міндетті әлеуметтік сақтандыру жүйесіне қатыспайтындарға берілетін жәрдемақыны жыл басынан бері 124,7 мың адам алды. Бұл төлемдерге 36,4 миллиард теңге жұмсалған. Қазан айында 126,8 мың алушыға 3,7 миллиард теңге беріледі.
2025 жылы жәрдемақылар мөлшері 6,5 пайызға өсірілді. Есеп айырысу МРП негізінде жүргізіледі. 2025 жылғы МРП — 3 932 теңге.
Бала тууға арналған біржолғы жәрдемақы:
- 1-ші, 2-ші және 3-ші балаға — 149 416 теңге (38 МРП);
- 4-ші және кейінгі балаларға — 247 716 теңге (63 МРП).
Бір жарым жасқа дейін күтім жасауға арналған ай сайынғы жәрдемақы:
- 1-ші балаға — 22 648 теңге;
- 2-ші балаға — 26 777 теңге;
- 3-ші балаға — 30 866 теңге;
- 4-ші және одан кейінгі балаларға — 34 995 теңге.
Жұмыс істейтін ата-аналарға төлемдер Мемлекеттік әлеуметтік сақтандыру қорынан жүргізіледі — декреттік демалыс кезеңінде, сондай-ақ жаңа туған баланы асырап алған жағдайда. Жыл басынан бұл төлемді 175,1 мың адам алып, жалпы сомасы 245,3 миллиард теңгені құрады. Қазан айында — 17,8 мың адам, төлем көлемі 17,4 миллиард теңге болды. Орташа төлем мөлшері — 1 457 321 теңге.
Сонымен қатар, міндетті әлеуметтік сақтандыру жүйесіне қатысушыларға баланың туған күнінен бастап бір жарым жасқа дейін ай сайын табыстың 40 пайызы мөлшерінде әлеуметтік төлем тағайындалады. Егіз немесе үшем туған жағдайда төлем әр балаға бөлек есептеледі.
2025 жылдың он айында бұл төлемді 208,2 мың адам рәсімдеп, жалпы сомасы 358,6 миллиард теңгеге жеткен. Қазан айында — 18,8 мың алушы, төлем көлемі 34,5 миллиард теңге болды. Орташа айлық төлем — 86 493 теңге.