Алматы қаласының әкімі Дархан Сатыбалды төрағалық еткен кеңесте сыртқы жарықтандыру жүйесін дамыту және жаңғырту мәселелері қаралды, – деп хабарлайды aqshamnews.kz тілшісі.
Қаланың Энергетика және сумен жабдықтау басқармасы өкілдерінің мәліметінше, 2025 жылдың қорытындысы бойынша бұрын жарықтандырылмаған 1189 учаске жарықпен қамтылып, 12 мыңнан астам шам орнатылған. Сонымен қатар, 15,5 мыңнан астам ескі жарық нүктесі жаңартылып, 80-нен астам көшеде жарықтандыру желілері жаңғыртылды. Қаладағы 420 нысан сәулеттік жарықтандырумен қосымша қамтылды.
Жұмыстар биыл да жалғасын тапқан. Жоспарға сәйкес, 12 мыңға жуық жаңа шам орнату, 2 мың жарық бағанасын қою және 126 шақырым жарықтандыру желісін тарту көзделген. Бұдан бөлек, шамамен 30 мың шамды жөндеу және жарықты басқару жүйелерін жаңғырту жоспарланып отыр.
Ғимараттарды сәулеттік жарықтандыруға да ерекше назар аударылуда. Қалада 440-тан астам нысанды жарықтандыру жобалары жүзеге асырылып, жұмыстарды 2026 жылы аяқтау көзделген.
Аталған шаралар қаланың қауіпсіздігін арттыруға, қалалық ортаның сапасын жақсартуға және тұрғындар үшін қолайлы жағдай жасауға бағытталған.