Биыл 8 айда елімізде балаға қысым көрсетудің 237 жағдайы тіркелді, - деп хабарлайды Аqshamnews.kz тілшісі 24.kz-ке сілтеме жасап.
Оның ішінде 219 іс сот және құзырлы органдарда қаралды. Құқықтық статистикаға үңілсек, буллинг жасағандардың 45 пайызы 12 мен 16 жас аралығындағы оқушылар. Қалғаны жасөспірімдер мен ересектердің тарапынан көрсетілген әлімжеттік екен. 88 істі сот және өзге де өкілетті органдар тоқтатқан.
Сонымен қатар, 87 жағдайда ата-аналарға ескерту жасалды. Қаңтар-тамыз аралығында 131 адам буллингке қатысты әкімшілік жауапкершілікке тартылыпты. 44 іске қатысты айыппұл салынған. Айта кету керек, әкімшілік кодекстің 127 бабы, екінші тармағына сәйкес, балаға бірінші рет қысым көрсеткені үшін 10 айлық есептік көрсеткіш, яғни 39 мың теңгеден астам айыппұл тағайындалады. Егер бұл жағдай қайталанса, онда айыппұл мөлшері еселеніп, 118 мың теңгеге дейін жетуі мүмкін. Жалпы, биыл буллинг үшін 1 млн 655 мың теңгенің айыппұлы тағайындалған екен. Оның 1 млн теңгеден астамы осы уақытқа дейін өндірілді.