№92 лицейде «Бір кітаптың ізімен» атты жоба қолға алынды.
Бұл жобаның мақсаты оқушыларға кітап оқыту арқылы рухани жан дүниесін оятып, білімдерін молайтып, рухани қазына- кітап әлеміне шолу және оларды арман биігіне самғатып, ақыл-ой сұлулық әлеміне бойлату болып отыр.
Әр сыныпқа ай сайын қазақ әдебиетінің бай мұрасынан ерекше орын алатын жазушылардың шығармаларынан бір кітап таңдалып, оқушылар сол кітапты оқып, оның мазмұнын түсініп, шығармашылық тапсырмалар орындайды. Мәселен, осы айда 5- сынып оқушылары Бердібек Соқпақбаевтың «Он алты жасар чемпион» повесін, 6-сынып оқушылары Сайын Мұратбековтің «Кәментоғай» әңгімесін, 7-сынып оқушылары Саят Қамшыгердің «Тастамашы, Ана!» әңгімесін, 8-сынып оқушылары Бауыржан Момышұлының «Ұшқан ұя» романын, 9-сынып оқушылары Бейімбет Майлиннің «Шұғаның белгісі» повесін, 10-сынып оқушылары Жүсіпбек Аймауытовтың «Ақбілек» романын, 11-сынып оқушылары Мұхтар Әуезовтің «Абай жолы» роман- эпопеясын оқып шықты. Сонымен қатар, айдың соңында оқушылар қорытынды тапсырмаларды орындады. Соның бірі дәлелі- «Ақбілек» романының желісі аясында 10-сыныптар арасында «Үздік сахналық қойылым» ұйымдастырылды.
Жүсіпбек Аймауытов бұл туындысында сол кездегі әлеуметтік теңсіздікті, қазақ әйелінің ауыр тағдырын және адам рухының мықтылығын көрсетті. Ақбілек – қиындыққа тап болса да, мойымаған, әділеттілік үшін күрескен қайсар қыз. Роман тағдырдың тәлкегіне қарамастан, рухани тазару мен алға ұмтылудың маңыздылығын үйретеді. Бұл шығарма тек өткен дәуірдің бейнесі емес, қазіргі заман үшін де өзекті. Бұл қойылымнан әркім өзіне сабақ алғаны анық. Аталмыш шараға 10 «А», «Ә», «Б», «В», «Г» сынып қатысты. Қойылым лицей директоры Кульжан Сауытқызының құтықтауымен басталды. Оқушылар бұл қойылымды сахналау барысында өз қызығушылықтарын танытып, романды толықтай оқығандарын дәлелдеді. Әр сынып өз қалаулары бойынша оқыған шығарманың үзінділерін шеберлікпен сомдап шықты. Сахнаның безендірілуі және сахна мәдениеті талапқа сай болғанын баса айтқан жөн. Әділқазылар алқасы оқушыларды бағалау оңайға түспегенін айтып, әрбір сыныптың ерекшеліктеріне тоқталды. Үздік өнер көрсеткен оқушылар түрлі номинациялармен марапаттады.