Қазақстанның халық жазушысы, танымал драматург және дарынды сазгер Исраил Сапарбай 85 жасына қараған шағында дүниеден өтті, деп хабарлайды aqshamnews.kz.
Бұл туралы Жазушылар одағының төрағасының орынбасары Қасымхан Бегманов өзінің Facebook парақшасында жазды.
"Бүгін таңнан суық хабар келді. Таңғы сағат төрт шамасында Қазақстанның халық жазушысы, Тәуелсіз «Платиналы Тарлан» сыйлығының лауреаты, белгілі ақын, драматург, сазгер Исраил Сапарбай ағамыз 85 жасында дүниеден озды. Ұлы ақынның Қаскелеңдегі үйінде, отбасының қасында ауыр науқастан қайтқаны туралы хабарды оның ұлы Нұрлан Исраилұлы жеткізді", - деп жазды Қасымхан Бегманов.
Исраил Сапарбай қазақ әдебиетінде өзіндік орны бар лирик ақын болып, артында сұлу сазды әндер, поэзияның алтын қорына енген өлеңдер және үлкен аудитория тапқан пьесалар қалдырды.