Белгілі сатирик-жазушы Еркін Жаппасұлы дүниеден өтті, - деп хабарлайды Aqshamnews.kz.
Еркін Жаппасұлы 1954 жылы Семей облысы, Ақсуат ауданының «Екпін» ауылында дүниеге келген. 1982 жылы Қазақ мемлекеттік университетінің (қазіргі ҚазҰУ) журналистика факультетін бітірген. Еңбек жолын «Қазақстан пионері» («Ұлан») газетінде бастаған, кейін республикалық «Қазақкітап» бірлестігінің насихат редакциясында, сондай-ақ, «Қазақ әдебиеті» газетінде тілші қызметін атқарған.
Алғашқы сықақ туындылары 1967 жылдан бастап «Семей таңы», «Қазақ әдебиеті», «Лениншіл жас» (қазіргі «Жас Алаш»), «Қазақстан пионері» газеттерінде, «АраШмель», «Жұлдыз», «Жалын» журналдарында жарияланған.
Ол қазақ сатирасының дамуына айрықша үлес қосқан. «Кімге күлкі, кімге түрпі?», «Ой, қытығым келеді…», «Қымсынбашы, қылықтым», «Мыңқетпес мыңқ етер емес» атты кітаптары жарық көрген. 2003 жылы «Қымсынбашы, қылықтым» еңбегі үшін Халықаралық «Алаш» әдеби сыйлығын алған. Оның шығармалары орыс және қытай тілдеріне аударылған.
Сонымен бірге, Еркін Жаппасұлы «Қазақстан», «Хабар» телеарналарының әзіл-сықақ хабарларына, әйгілі «Тамаша» ойын-сауық отауына тұрақты автор болған.