Белгілі әдебиет сыншысы әрі режиссер Ғалым Доскен өмірден өтті, - деп хабарлайды Aqshamnews.kz тілшісі.
Белгілі филолог, әдебиет зерттеушісі, режиссер және сценарист Ғалым Доскен дүниеден өтті. Ол 1960 жылдың 19 шілдесінде туған.
Ғалым Доскен Абай атындағы Қазақ педагогикалық институтын тәмамдаған. Еңбек жолында отандық телеөнер мен мәдениетке айтарлықтай еңбек сіңірді. 2001–2002 жылдары «Қазақстанның республикалық телевидение және радио корпорациясы» ЖАҚ басқарма төрағасының бірінші орынбасары, 2002–2006 жылдары «Қазақстан» РТРК басқарма төрағасы қызметін атқарды. 2007 жылдан бері «Ел» продюсерлік орталығының көркемдік жетекшісі болды.
Ол «Сәулені күту», «Ұлы дала астаналары», «Маңғыстау қабірлерінің түсі», «Жоғалған жарық хроникасы» сынды деректі фильмдердің, «Тоғыз құйрықты ақ түлкі», «Сиқырлы флейта», «Билейтін құс» кітаптарының авторы. Сонымен қатар «Жезтырнақ» балетінің либреттосын жазған.
Қазақ мәдениетіне, тележурналистикасына және әдебиетіне өлшеусіз үлес қосқан талантты тұлғаның қазасы ел үшін үлкен қайғы болды. Марқұмның туған-туыстарына, жақындарына көңіл айтамыз.