Қоғам қайраткері Бекнұр Кисиков жаңа Конституцияның күшіне енуі еліміздегі саяси, құқықтық және әлеуметтік-экономикалық реформалардың маңызды кезеңі екенін атап өтті, – деп хабарлайды aqshamnews.kz тілшісі.
Оның айтуынша, Конституция жалпыұлттық референдумның қорытындысы бойынша қабылданып, кең ауқымды қоғамдық талқылаудың нәтижесінде, оның ішінде конституциялық құқық саласындағы сарапшылардың қатысуымен әзірленді.
«Біз үгіт-насихат топтарының құрамында болып, азаматтарға Конституцияға енгізілген өзгерістерді және олардың халықтың өміріне қалай әсер ететінін түсіндірдік. Сондай-ақ конституциялық құқық саласының мамандарымен кездесулер өткізіліп, әрбір норманың практикалық маңызы жан-жақты түсіндірілді», – деді Бекнұр Кисиков.
Қоғам қайраткері тіл саясатына да ерекше тоқталды. Оның айтуынша, мемлекеттік тілдің мәртебесі айқын сақтала отырып, еліміздегі барлық тілдерге құрмет пен тең құқық қамтамасыз етіледі. Бұл Қазақстанның көпұлтты әрі көпмәдениетті сипатын көрсетеді.
«Қазақ тілі – біздің мемлекеттік тіліміз. Сонымен қатар біз барлық тілдерге құрметпен қарап, қоғамдағы көптілділікті қолдаймыз», – деді ол.
Сондай-ақ, Бекнұр Кисиков жаңа Конституция азаматтардың құқықтарын қорғаудың құқықтық тетіктерін күшейтетінін атап өтті. Оның айтуынша, жаңа нормалар азаматтардың мемлекеттік органдардың шешімдеріне шағымдану мүмкіндіктерін кеңейтіп, оның ішінде Конституциялық сотқа жүгіну құқығын нығайтады.
Ол экономикалық және әлеуметтік саладағы өзгерістердің де ерекше маңызға ие екенін айтты. Атап айтқанда, жекеменшік институтын нығайтуға және нарықтық тетіктерді дамытуға бағытталған нормалардың енгізілгенін жеткізді.
«Экономика – ең алдымен әрбір азаматтың әл-ауқаты. Жаңа нормалар халықтың өмір сүру сапасын арттыруға және жеке меншік құқығын қорғауға бағытталған», – деді қоғам қайраткері.
Оның айтуынша, Конституция – еліміздің барлық заңнамалық жүйесінің негізі. Осыған байланысты қолданыстағы заңнаманы негізгі заңның жаңа талаптарына сәйкестендіру бойынша ауқымды жұмыс жүргізіледі.
Сөз соңында Бекнұр Кисиков қазіргі кезеңді елдің терең жаңғыру дәуірі деп бағалап, жүргізіліп жатқан реформалардың нәтижесі алдағы уақытта айқын көрініс табатынына сенім білдірді.