Облыстық дене шынықтыру және спорт басқармасының баспасөз қызметі хабарлауынша, батысқазақстандық спортшы Ринат Қалмияров боччадан Қазақстан чемпионы атанды, – деп хабарлайды aqshamnews.kz тілшісі.
Спортшы бақ сынаған ел біріншілігі Астана қаласында шілденің үші мен алтысы аралығында өтті. Қазақстан чемпионатында 16 өңірдің спортшылары бақ сынады. Жарыс елорданың Инклюзивті спорт орталығында ұйымдастырылды.
— Батыс Қазақстан облысының спортшысы Ринат Қалмияров ВС3 санатында үздік нәтиже көрсетіп, Қазақстан чемпионы атанды! Рамп-операторы Жансерік Қалмияров болды. Жерлесімізді айтулы жеңісімен шын жүректен құттықтаймыз. Алдағы жарыстарда да толағай табыстар мен жарқын жеңістер тілейміз, – деп хабарлады облыстық дене шынықтыру және спорт басқармасы.
Бочча – қимыл-қозғалысы шектеулі спортшыларға арналған дәлдікке негізделген паралимпиадалық спорт түрі. Ойын барысында қатысушылар былғары доптарды нысана допқа барынша жақын орналастыруға тырысады. Аталмыш спорт түрі Паралимпиада ойындарының ресми бағдарламасына енген.